baithe the log pahlu-ba-pahlu piye hue
ik ham the teri bazm men aansu piye hue
dekha jise bhi us ki mohabbat men mast tha
jaise tamam shahr ho daaru piye hue
takrar be-sabab to na thi rind o shaikh men
karte bhi kya sharab the har do piye hue
phir kya ajab ki log bana len kahaniyan
kuchh main nashe men chuur tha kuchh tu piye hue
yuun un labon ke mas se moattar huun jis tarah
vo nau-bahar-e-naz tha khushbu piye hue
yuun ho agar ‘faraz’ to tasvir kya bane
ik shaam us ke saath lab-e-ju piye hue
Leave a Reply