Basir Sultan Kazmi
baiThe rahenge vo to hamesha daba ke baat
ham hi karenge un se kisi roz ja ke baat
kuchh bhi nikal sakte hain matlab vo baat ka
karta huun is liye main bahut bach-bacha ke baat
pechida ho ga.e hain hamare ta.alluqat
karni paḌi hai mujh ko ghuma ke phira ke baat
ik ham ki le ke baiTh ga.e ek lafz ko
ik vo ki chal diye jo hansi men uḌa ke baat
kahta huun dil ki baat ghaTa kar raqib se
karta hai vo jo aage baḌha ke chaḌha ke baat
vo jo bani hui hai rukavaT si darmiyan
milna ho ab hamen to milen vo haTa ke baat
matlub va.izon ko hain shayad hamare ashk
hansne ki bhi vo karte hain aksar rula ke baat
‘basir’ bayan-e-sada ko paaya hai be-asar
kiije zara sanvar ke qadre bana ke baat
Leave a Reply