baiThe hue hain ham ḳhud ankhon men dhuul Daale
ai ru-e-yar tu ne parde fuzul Daale
jhagḌa hi tum chuka do jab tegh khinch li hai
aafat men phir na mujh ko jan-e-malul Daale
surat to ek hi thi do ghar hue to kya hai
dair-o-haram ki babat jhagḌe fuzul Daale
turbat se koi puchhe nairangi-e-zamana
ba.azon ne ḳhaak Daali ba.azon ne phuul Daale
kahte hain jis ko jalva vo bhi kahin ruka hai
aaḌen fuzul ki hain parde fuzul Daale
sadqe dil-o-jigar ko mizhgan pe kar chuka huun
main ne to apne hathon kanTon pe phuul Daale
kaise hisab joḌun a.amal-e-ma.asiyat ka
jab us ki shan-e-rahmat ginti men bhuul Daale
‘muztar’ dilon ke andar rakhne ke the ye kafir
dozaḳh men kyuun ḳhuda ne jannat ke phuul Daale
Leave a Reply