Arsh Siddiqui
baiTha huun vaqf-e-matam-e-hasti miTa hua
zahr-e-vafa hai ghar ki faza men ghula hua
ḳhud un ke paas ja.un na un ko bula.un paas
paaya hai vo mizaj ki jiina bala hua
apni zaban ko aaj vo tasir hai nasib
jis ko ḳhuda-e-husn kaha vo ḳhuda hua
us par ghalat hai ishq men ilzam-e-dushmani
qatil hai mere hujla-e-jan men chhupa hua
jaan hai to fikr-e-ishrat-e-bazm-e-jahan bhi hai
kab dil se dard-e-alam-e-imkan juda hua
hain jism-o-jan baham ye magar kis ko hai ḳhabar
kis kis jagah se daman-e-dil hai sila hua
hai rahvar-e-shauq pe aseb-e-be-dili
rakkha hai kab se samne saghar bhara hua
hasil hai jis ko ‘arsh’ fazaon pe iḳhtiyar
vo dil ke saath khel raha hai to kya hua
Leave a Reply