Baham Jo Husn O Ishq Mein Yarana Ho Gaya

baham jo husn o ishq men yarana ho gaya

koi pari bana koi divana ho gaya

itni si baat par ki hui sham.a be-hijab

tayyar jaan dene ko parvana ho gaya

tang aa gaya huun vusat-e-mafhum-e-ishq se

nikla jo harf munh se vo afsana ho gaya

har dil men yaad ban ke chhupe hain butan-e-ishq

allah tera ghar bhi sanam-ḳhana ho gaya

farigh takallufat se hain rind-e-be-riya

chullu hi un ke vaste paimana ho gaya

tafsil apne jaur-o-sitam ki na puchhiye

kya kya na aap ne kiya kya kya na ho gaya

dekhi hai jab se aankh kisi ki phiri hui

aalam miri nigah men begana ho gaya

ḳhush huun ki ho raha hai ye irshad le ke dil

‘ahsan’ qubul tera ye nazrana ho gaya

Leave a Comment