poet

Baham Buland-O-Past Hain Kaif-E-Sharab Ke

baham buland-o-past hain kaif-e-sharab ke

ankhon men hain tulu-o-ghurub aftab ke

piite hain surkh-o-zard pyale sharab ke

kya kya hain auj-o-past men rang aftab ke

barson se DhunDhta hai mazamin sharab ke

gardun ulat raha hai varaq aftab ke

saaqi unDel jaam subuhi subu ki khair

mushtaq kab se hain lab-e-shab aftab ke

utthe vo dud-e-dil ki falak ho gaya siyah

gul ho gae charagh mah-o-aftab ke

likkhun jo un ke chehra-e-raushan ka vasf main

paida karun zaban-o-dahan aftab ke

dho de sharab se mire angur zakhm ko

ta-jalve bakhshen zakhm-e-kuhan aftab ke

kho dega dud-e-ah falak ki barahnagi

Dalegi shaam munh pe naqab aftab ke

khali kahan falak sitam-e-rozgar se

rakhta hai dil pe daagh mah-o-aftab ke

jaane to do falak pe mire nala-e-junun

purze udaenge varaq-e-aftab ke

ai charkh-e-pir dekh liin athkheliyan tiri

yaad aa gae hamen bhi zamane shabab ke

paai hai main ne zakhm se talim-e-khamushi

goya lab-e-sukut dahan hain javab ke

marhum-e-arzu hain sada-e-shikast men

rah rah gae hain bhar ke phaphole habab ke

kis eatibar men nafas-e-chand ai ‘nasim’

shab har ke vaste ye tamashe hain khvab ke

More Poems

Leave a Comment