Agha Shayar Qazalbash
bahar aai hai phir chaman men nasim ithla ke chal rahi hai
har ek ghuncha chatak raha hai gulon ki rangat badal rahi hai
vo aa gae lo vo ji utha main adu ki ummid-e-yas thahri
ajab tamasha hai dil-lagi hai qaza khadi haath mal rahi hai
batao dil duun na duun kaho to ajiib nazuk moamla hai
idhar to dekho nazar milao ye kis ki shokhi machal rahi hai
tadap raha huun yahan main tanha vahan adu se vo ham-baghal hain
kisi ke dam par bani hui hai kisi ki hasrat nikal rahi hai
ghata vo chhai vo abr uttha yahi to hai vaqt mai-kashi ka
bulao ‘shair’ ko hai kahan vo sharab shishe se dhal rahi hai
Leave a Reply