Wahshat Raza Ali Kalkatvi
bahar aa.i hai ara.ish-e-chaman ke liye
miri bhi tab.a ko tahrik hai suḳhan ke liye
ḳhayal tak na kiya ahl-e-anjuman ne kabhi
tamam raat jali sham.a anjuman ke liye
vatan men aankh churate hain ham se ahl-e-vatan
taḌapte rahte hain ghurbat men ham vatan ke liye
chaman ke daam se ja.enge ham kahan sayyad
qafas fuzul hai parvarda-e-chaman ke liye
main qaid-e-ashk se azad huun mohabbat men
ki tujh ko sham.a banana hai anjuman ke liye
zaban-e-ahl-e-basirat pe arz hairat hai
sukut daad hai goya mire suḳhan ke liye
farogh-e-tab-e-ḳhuda-dad garche tha ‘vahshat’
riyaz kam na kiya ham ne kasb-e-fan ke liye
Leave a Reply