Mohsin Zaidi
baagh saara to bayaban na hua tha so hua
jo ḳhizan ka kabhi ehsan na hua tha so hua
ham to bedar hue ḳhvab se apne lekin
vo bhi ḳhvabon men pareshan na hua tha so hua
ham bhi kuchh soch ke kar baiThe bil-aḳhir shikva
vo bhi pahle to pasheman na hua tha so hua
mish.alen sar ki saja.i ga.iin tasht-e-zar men
kab se maqtal men charaghan na hua tha so hua
safar-e-jan ki hui ab kahin ja kar takmil
ya.ani main be-sar-o-saman na hua tha so hua
dekhte dekhte aa pahuncha saron tak paani
ab tak andaza-e-tufan na hua tha so hua
dosto main jo ta.alluq tha vo baaqi na raha
dushmanon men koi paiman na hua tha so hua
aur kya mujh ko sila milta ḳhulus-e-dil ka
hadaf-e-tohmat-e-yaran na hua tha so hua
dasht men abr to barsa vo do ik buund sahi
pahle itna bhi to imkan na hua tha so hua
‘mohsin’ achchha hi hua us ne ulaT di jo naqab
rang us ka jo numayan na hua tha so hua
Leave a Reply