baagh men jab ki vo dil khun-kun-e-har-gul pahunche
bilbilati hui gulzar men bulbul pahunche
sadma-e-sham-e-ajal mujh ko na bilkul pahunche
gar miri daad ko kal tak bhi vo kakul pahunche
dil bhi le kar alam-e-ah muqabil pahuncha
neza-bazan-e-mizha jab ba-taghaful pahunche
mehr kucha tira jhade hai ba-jarub-e-shua
ki isi tarah baham tujh se tavassul pahunche
apna ye munh to na tha aap talak ham pahunchen
aap ka jab ki hua ham pe tafazzul pahunche
ham-rah-e-yas-o-alam dasht-e-junun men kal ham
ba-tahammul ba-taammul ba-tajammul pahunche
gar tire vazn pe main saare qavafi bandhun
dam tira naak men ai bab-e-tafavvul pahunche
khana-abad tumhara ho ki ham hazrat-e-ishq
nafa ko tum se ba-ayyam-e-tavakkul pahunche
dard-o-gham yas-o-alam soz-e-dil o dagh-e-jigar
tohfe jo aap ne bheje hamen bilkul pahunche
jab gaya husn to aaya tire ikhlas ka baar
ab taraqqi hai tab ayyam-e-tanazzul pahunche
qahr ik rind pe qul pir-e-mughan ne tha padha
sher ye ham ne suna sunne ko jab qul pahunche
tars-e-uqba hai to mai-khana men rah ai zahid
tab bacho vaan jo baja kaan men qulqul pahunche
rashk-e-gul baagh men baitha tha to ham bhi ‘ehsan’
ye ghazal padhte hue vaan ba-tajahul pahunche
Leave a Reply