badnam ka jahan men sahara nahin koi
patthar har ek haath men iisa nahin koi
kuchh der meri khaaT pe baiTho mire aziiz
is khaaT men chhupa hua kanTa nahin koi
kamzoriyon ka meri jahan bhar men shor hai
meri ḳhususiyat ka charcha nahin koi
ḳhairat chaar TukḌon ki nikle the banTne
aisa laga zamin pe bhuka nahin koi
ham bhi ma.ashre ko chale the sanvarne
dushman hazar ho ga.e sudhra nahin koi
gamlon men qaid ho gaya ‘javed’ phuul kyon
ghar ki hadon ke paar to mahka nahin koi
Leave a Reply