Shmashad Shad
badalne vaali hai faza ai dil kuchh aur der ruk
hai shab ka aḳhiri pahar andhere honge zer ruk
jahan-e-dil pe raushni bikherne ke vaste
vo mahtab aa.ega abhi nazar na pher ruk
abhi abhi hua hai ishq abhi se kyon hai muztarib
lagega teri zindagi men bhi ghamon ka Dher ruk
bahut dinon ke ba.ad aa.e hain vo ḳhvab men unhen
main aankh bhar ke dekh luun ai ḳhvab thoḌi der ruk
nabat-o-naḳhl par giran guzarta hai ye mashghala
daraḳht ke tane pe yuun huruf mat uker ruk
nahin hai kaam buz-dilon ka ishq ke mahaz par
yahan sabhi diler hain jo tu bhi hai diler ruk
milegi dad-e-fan kuja jalenge tujh se ham-suḳhan
har ek bazm men hunar ke jalve mat bikher ruk
dil-e-gharib ko ai ‘shad’ ḳhvahishon ke jaal men
qasam hai tujh ko yuun na be-muravvati se gher ruk
Leave a Reply