baḌa azar-e-jan hai vo agarche mehrban hai vo
agarche mehrban hai vo baḌa azar-e-jan hai vo
misal-e-asman hai vo mujhe zarḳhez karta hai
mujhe zarḳhez karta hai misal-e-asman hai vo
karim-o-sa.eban hai vo mujhe mahfuz rakhta hai
mujhe mahfuz rakhta hai karim-o-sa.eban hai vo
agarche be-makan hai vo panahen mujh ko deta hai
panahen mujh ko deta hai agarche be-makan hai vo
baḌa aram-e-jan hai vo liye phirta hai siine men
liye phirta hai siine men baḌa aram-e-jan hai vo
agarche be-zaban hai vo nazar se baat karta hai
nazar se baat karta hai agarche be-zaban hai vo
ik aisa zahr-e-jan hai vo main jis ko pi ke zinda huun
main jis ko pi ke zinda huun ik aisa zahr-e-jan hai vo
ki bahr-e-be-karan hai vo tabhi sahil nahin milta
tabhi sahil nahin milta ki bahr-e-be-karan hai vo
mizaj-e-dushmanan hai vo paraya bhi hai apna bhi
paraya bhi hai apna bhi mizaj-e-dushmanan hai vo
kamal-e-dostan hai vo vahi avval vahi aḳhir
vahi avval vahi aḳhir kamal-e-dostan hai vo
amir-e-karvan hai vo main us ki raah chalta huun
main us ki raah chalta huun amir-e-karvan hai vo
baḌa gauhar-fishan hai vo mujhe bhi kuchh guhar dega
mujhe bhi kuchh guhar dega baḌa gauhar-fishan hai vo
sunahri kahkashan hai vo dahakte hain ka.i suraj
dahakte hain ka.i suraj sunahri kahkashan hai vo
suna hai mehrban hai vo ‘anis’ itrate phirte hain
‘anis’ itrate phirte hain suna hai mehrban hai vo
Leave a Reply