bab-e-hairat se mujhe izn-e-safar hone ko hai
tahniyat ai dil ki ab divar dar hone ko hai
khol den zanjir-e-dar aur hauz ko khali karen
zindagi ke baagh men ab sah-pahar hone ko hai
maut ki aahat sunai de rahi hai dil men kyuun
kya mohabbat se bahut khali ye ghar hone ko hai
gard-e-rah ban kar koi hasil safar ka ho gaya
khaak men mil kar koi laal-o-guhar hone ko hai
ik chamak si to nazar aai hai apni khaak men
mujh pe bhi shayad tavajjoh ki nazar hone ko hai
gum-shuda basti musafir laut kar aate nahin
moajaza aisa magar bar-e-digar hone ko hai
raunaq-e-bazar-o-mahfil kam nahin hai aaj bhi
saneha is shahr men koi magar hone ko hai
ghar ka saara rasta is sarkhushi men kat gaya
is se agle mod koi ham-safar hone ko hai
Leave a Reply