ba-nam-e-kucha-e-dildar gul barse ki sang aae
hansa hai chak-e-pairahan na kyuun chehre pe rang aae
bachate phirte akhir kab talak dast-e-azizan se
unhin ko saunp kar ham to kulah-e-nam-o-nang aae
hanso mat ahl-e-dil apni si jaano bazm-e-khuban men
chale aae idhar ham bhi bahut jab dil se tang aae
kahan sehn-e-chaman men baat ku-e-sar-faroshan ki
idhar se sada-ru nikle udhar se lala-rang aae
karo ‘majruh’ tab dar-o-rasan ke tazkire ham se
jab us qamat ke saae men tumhen jiine ka dhang aae
Leave a Reply