Ahmad Adil
azal se be-sabati ka gila tha
magar insan khud kam-hausla tha
jise samjhe samundar ki ravani
sabil-e-zindagi ka bulbula tha
ajab si thi masafat tirgi ki
chala tha gir pada tha phir chala tha
har ik lamha rifaqat ka hamari
dhanak ke saat rangon se saja tha
tavazun tha zaruri zindagi men
talavvun ka magar apna maza tha
khada tha main pasheman phir vahin par
jahan se laghzishon ka silsila tha
kabhi socha bhi ‘adil’ kyuun mila sab
hua hasil vahi jo de chuka tha
Leave a Reply