aur ab to mere chehre se ubhar aata hai vo
aa.ina main dekhta huun aur nazar aata hai vo
hal-e-dil kahne ko barish ki zarurat hai mujhe
aur mere ghar hava ke dosh par aata hai vo
raat ko dil se koi avaz aati hai mujhe
jism ki divar se kaise guzar aata hai vo
vaqt kho jaata hai meri anjuman men is liye
apne baazu par ghaḌi ko bandh kar aata hai vo
aḳhiri ziine talak koi ḳhabar hoti nahin
dil ke tah-ḳhane men chupke se utar aata hai vo
main hava ki guftugu likhta huun barg-e-sham par
jo kisi ko bhi nahin aata hunar aata hai vo
sar-buridon ko tunak kar raat suraj ne kaha
aur jab shanon pe rakh kar apna sar aata hai vo
vo nikalta hi nahin ‘mansur’ teri zaat se
zikr aa.e to sahi ankhon men dar aata hai vo
Leave a Reply