auj-e-maqam-e-dost pe apna guzar kahan
shayan-e-sidrah ta.ir-e-be-bal-o-par kahan
tu hai ḳhayal men to hai ara.ish-e-ḳhayal
tu hi na ho nazar men to zauq-e-nazar kahan
dekho jise vo mast-e-mai-e-kibr-o-naz hai
duniya bahut ḳharab hai jaa.en magar kahan
hai ibtida-e-sham se zulmat ka safar
hoti hai dekhiye shab-e-gham ki sahar kahan
taqdir men hai us ki fishar-e-lahad vahi
tadbir se uḌa bhi to pahuncha bashar kahan
is be-ḳhudi men kis ko hai parva ma.aal ki
maujud mubtada hi na ho to ḳhabar kahan
‘mahrum’ kya hi ḳhuub hai ‘hali’ ki vo ghazal
tujh se jahan men laakh sahi tu magar kahan
Leave a Reply