auj-e-maqām-e-dost pe apnā guzar kahāñ
shāyān-e-sidrah tā.ir-e-be-bāl-o-par kahāñ
tū hai ḳhayāl meñ to hai ārā.ish-e-ḳhayāl
tū hī na ho nazar meñ to zauq-e-nazar kahāñ
dekho jise vo mast-e-mai-e-kibr-o-nāz hai
duniyā bahut ḳharāb hai jaa.eñ magar kahāñ
hai ibtidā-e-shām se zulmāt kā safar
hotī hai dekhiye shab-e-ġham kī sahar kahāñ
taqdīr meñ hai us kī fishār-e-lahad vahī
tadbīr se uḌā bhī to pahuñchā bashar kahāñ
is be-ḳhudī meñ kis ko hai parvā ma.aal kī
maujūd mubtadā hī na ho to ḳhabar kahāñ
‘mahrūm’ kyā hī ḳhuub hai ‘hālī’ kī vo ġhazal
tujh se jahāñ meñ laakh sahī tū magar kahāñ