Kaashif Shakiil
ashkon men aaj phir se naha.e hue hain ham
kuche se us sanam ke bhaga.e hue hain ham
hakim vatan ke vaste qurbaniyan na puchh
jaan ik taraf jahan luTa.e hue hain ham
mujh ko jo dekha us ne kaha yusufi suno
ungli to kya jigar hi kaTa.e hue hain ham
ham ḳhvab tere dekhen ye mumkin nahin kabhi
tujh se bichhaḌ ke niind ganva.e hue hain ham
ham sab aTuuT ang hain ik murda jism ke
ahl-e-vatan ke hathon sata.e hue hain ham
ai maut ruk ja aankh hamari na band kar
ankhon men ḳhvab-e-vasl saja.e hue hain ham
kal tak samajh rahe the hamen ham-nafas magar
ye kya sitam hai aaj para.e hue hain ham
‘kashif’ zamin-e-husn pe barsat ke liye
avargi ko abr bana.e hue hain ham
Leave a Reply