Rahi Shahabi
ashk ankhon men aur dil men aahon ke sharar dekhe
barsat ke mausam men jalte hue ghar dekhe
aḳhir ko ye din tu ne ai dida-e-tar dekhe
milte hue miTTi men anmol guhar dekhe
jalvon ki haden aḳhir kaise muta.ayyan hon
ankhon ne tire jalve ta-hadd-e-nazar dekhe
gahna.e hue chand aur dhundla.e hue suraj
furqat men in ankhon ne kya sham-o-sahar dekhe
pahuncha de salam us tak ham tira-nasibon ka
jo ‘rahi’-e-ḳhush-qismat tanvir-e-sahar dekhe
Leave a Reply