ye karb-e-taḳhliq kaun jaane
sivae tere sivae mere
tu bint-e-maryam main bint-e-havva
miri masiha
ajiib rishta hai mera tera
vo lamha-e-karb
jab mujhe apne jan-o-tan ki ḳhabar nahin thi
har ek chehra tha dhundla dhundla
tamam shaklen miti miti si
faqat tiri shakl aaina thi
tiri sada thi
jo mere tar-e-nafas ko chhu kar
lahu ki gardish badha rahi thi
tiri sada is ghunuda dhadkan men
Dubti aur ubharti sanson ke darmiyan
zindagi se labrez jam-e-shirin
tiri sada men vo hausla tha vo sarḳhushi thi
ki aḳhiri baar
mere mathe pe sard qatre jo jhilmilae
hayat aur maut ki kashmakash ke mabain main ne dekha
tiri nigahon men jaise mahtab jagmagae
ki tera chehra ik aisi pakiza raushni se dhula hua tha
ki jaise injil khulti jaae
vahi tulua-e-hayat ka ḳhush-gavar manzar
ki tera malbus zindagi ke hazar rangon se bhar chuka tha
ki tere hathon ke nur-pyalon men
mera suraj damak raha tha