kanch ki zanjir tuuti to sada bhi aaegi
aur bhare bazar men tujh ko haya bhi aaegi
itr men kapde basa kar mutmain hai kis liye
ba-vafa hu ja ki yuun bu-e-vafa bhi aaegi
dekh le sahil se ji bhar ke machalti lahr ko
is taraf kuchh der men mauj-e-fana bhi aaegi
dudhiya nazuk gale men bandh le taaviz ko
aaj sunta huun ki basti men bala bhi aaegi
raat ke pichhle pahar dastak ka rakh lena khayal
patte khadkenge zara avaz-e-pa bhi aaegi
ujli ujli khvahishon par niind ki chadar na daal
yaad ke rauzan se kuchh taaza hava bhi aaegi
ja chuke saare bagule fikr ki kya baat hai
khet ko sairab karne ab ghata bhi aaegi
daur ke logon ko nazron men basa kar dekh le
qurb mil jaega ankhon men jila bhi aaegi
shahr-e-na-pursan ke manzar naqsh kar le zehn men
aankh raste men koi manzar gira bhi aaegi
dil ki masjid men kabhi padh le tahajjud ki namaz
phir sahar ke vaqt honton par dua bhi aaegi
zindagi ka ye maraz ‘afzal’ chala hi jaega
tere hathon men kabhi khak-e-shifa bhi aaegi
Leave a Reply