Shaz Tamkanat
vo niyaz-o-naz ke marhale nigah-o-suḳhan se chale ga.e
tire rang-o-bu ke vo qafile tire pairahan se chale ga.e
koi aas hai na hiras hai shab-e-mah kitni udaas hai
vo jo rang rang ke aks the vo kiran kiran se chale ga.e
koi un ki ankhen sarahta koi vahshaton se nibahta
ki vo ahuvan-e-ramida-ḳhu ye suna ḳhutan se chale ga.e
ka.i mehr-o-mah utar aa.e the vo yahin the mere ghar aa.e the
vo kali kali se dar aa.e the vo chaman chaman se chale ga.e
mire dil ki ab-o-hava lagi ki vafa bhi un ko ḳhata lagi
vahi sadgi se jo aa.e the vahi bankpan se chale ga.e
na to kufr ke na ḳhuda ke ham na dava ke ham na dua ke ham
ki butan-e-ka.aba-e-arzu dil-e-barhaman se chale ga.e
ye mira fareb-e-nazar nahin mire ham-qadam the yahin kahin
mujhe ahaTen bhi na mil sakin vo baḌe jatan se chale ga.e
ye baja ki tohfa-e-jan liye tire paas aa.e the be piye
vo gadagaran-e-tahi-subu tire husn-e-zan se chale ga.e
yahi tujh se apna tha vasta yahi thi hayat-e-muashqa
tiri ḳhalvaton ke sharik the tiri anjuman se chale ga.e
pas-e-umr bazu-e-shauq par sar-e-naz tha to hui ḳhabar
ka.i rat-jage tire gesuon ki shikan shikan se chale ga.e
vo bujhe bujhe vo luTe luTe sar-e-rah ‘shaz’ mile to the
unhen ab vatan men na DhunDiye ki vo ab vatan se chale ga.e
Leave a Reply