Siddique Mujibi
apne siine ko mire zaḳhmon se bharne vaali
tu kahan kho ga.i ḳhushbu si bikharne vaali
main to ho ja.unga ru-posh tah-e-ḳhak magar
ek ḳhvahish hai mire dil men na marne vaali
anhken viran hain honTon pe sulagte hain sarab
tah-nashin ho ga.i har mauj ubharne vaali
ik sakun pa gaya ja kar tah-e-dariya patthar
ab bala koi nahin sar se guzarne vaali
niind aati hai to ik ḳhauf sa lagta hai mujhe
jaise ik laash pe ho chiil utarne vaali
Dhal ga.e sang men is tarah ‘mujibi’ jazbat
ab shikan bhi nahin mathe pe ubharne vaali
Leave a Reply