Ishaq Athar Siddiqui
apne jauhar se siva bhi koi qimat mange
dil vo a.ina nahin hai ki jo surat mange
main ne dariyaon men bhi dasht ka manzar dekha
jab ki pyasa koi paani ki ijazat mange
us ki raftar ki tasvir bana.i na ga.i
kis qayamat ko ye hangam qayamat mange
naaz ki qamat-e-zeba ki bayan kya kiije
pairahan bhi jahan uslub-e-nazakat mange
jitna hota hai kam asar-e-ḳhushi ka lamha
dil mira dard se utni bhi na mohlat mange
har taraf shor hai avazon ka tasviron ka
kaun ghabra ke na ab gosha-e-uzlat mange
ḳhvab utre hain mire zehn pe jaise ilham
kaun in ḳhvabon se ta.abir ki qimat mange
kaun maslub hua kis pe laga hai ilzam
kashmakash aisi hai insaf adalat mange
Leave a Reply