Rashid Taraz
apne hone ka koi saaz nahin deti hai
ab to tanha.i bhi avaz nahin deti hai
jaane ye kaun si manzil hai shanasa.i ki
zat-e-mutlaq koi e.ajaz nahin deti hai
apni uftad tabi.at ka gila kya ho ki jo
ḳhvahishon ko par-e-parvaz nahin deti hai
sa.at-e-ḳhubi guzar jaati hai aate jaate
par ye tahrik-e-tag-o-taz nahin deti hai
jaane kyuun apni ana dahr se qurbat ke liye
koi parvana-e-aghaz nahin deti hai
raat mere liye ginti hai ‘taraz’ apne nujum
mere hone ka magar raaz nahin deti hai
Leave a Reply