Apne Dil Ki Aadat Hai Shahzadon Wali

apne dil kī aadat hai shahzādoñ vaalī

jaltī rakhtā hai qindīl murādoñ vaalī

vīrāne par bin barsā ik bādal huuñ maiñ

bojhal āñkheñ aur sūrat nā-shādoñ vaalī

pañkh hilā kar shaam ga.ī hai is āñgan se

ab utregī raat anokhī yādoñ vaalī

dil ke taaq meñ rozāna hī sajātā huuñ maiñ

ik din dekhī mūrat surḳh libādoñ vaalī

ab tak merī āñkhoñ meñ gulzār khilā hai

dekhī thī vo saa.at nek irādoñ vaalī

kyuuñ na rahe is dil meñ us kī kirchī

ik tamsīl jo dekhī thī fariyādoñ vaalī

Leave a Comment