apna nafas nafas hai ki sho.ala kahen jise
vo zindagi hai aag ka dariya kahen jise
har-chand shahr shahr hai jashn-e-sahar magar
vo raushni kahan hai savera kahen jise
vo rang-e-fasl-e-gul hai ki patjhaḌ bhi maat khaa.e
vo surat-e-chaman hai ki sahra kahin jise
jo charagar the vo bhi hue qatil-e-hayat
ab kaun hai ki apna masiha kahen jise
divar-o-dar pe sabt hain naqsh-o-nigar-e-yar
apna makan hai ki ajanta kahen jise
is tarah tabnak hai vo sajda-gah-e-shauq
jan-e-haram ki jan-e-kalisa kahen jise
‘vahid’ tumhen jo ḳhvahish-e-nam-o-numud ho
vo sha.iri karo ki muamma kahen jise
Leave a Reply