apna ḳhaliq ḳhud hi tha mera ḳhuda koi na tha
is jahan men mujh se pahle dusra koi na tha
rat-bhar chalta raha tha chand mere saath saath
dasht men us ka kahin bhi naqsh-e-pa koi na tha
fasle hi fasle the manzilen hi manzilen
ham-safar koi na tha aur rahnuma koi na tha
vo payambar tha khaḌa tha ik gali ke moḌ par
ajnabi basti men us ko janta koi na tha
duur tak phaili hui thiin dard ki tanha.iyan
do dilon ke darmiyan jab fasla koi na tha
kis qadar sunsan thi us shahr-e-ulfat ki gali
band the saare dariche jhankta koi na tha
gunjti thiin jab tumhari yaad ki ḳhamoshiyan
dil ke virane nagar men jagta koi na tha
jism-o-jan ki qaid men rahna paḌa ik umr tak
bach nikalne ka kahin bhi rasta koi na tha
Leave a Reply