Apna Andaz-E-Junun Sab Se Juda Rakhta Hun Main

Himayat Ali Shayar

apna andaz-e-junun sab se juda rakhta huun main

chak-e-dil chak-e-gareban se siva rakhta huun main

ghaznavi huun aur giraftar-e-ḳham-e-zulf-e-ayaz

but-shikan huun aur dil men but-kada rakhta huun main

hai ḳhud apni aag se har paikar-e-gul tabnak

le hava ki zad pe miTTi ka diya rakhta huun main

main ki apni qabr men bhi zinda huun ghar ki tarah

har kafan ko apne gird ehram sa rakhta huun main

dasht-e-ghurbat men huun avara misal-e-gard-bad

koi manzil hai na koi naqsh-e-pa rakhta huun main

mera saaya bhi nahin mera ujale ke baghair

aur ujale ka tasavvur ḳhvab sa rakhta huun main