poet

Anjum Tumhein Ulfat Abhi Karna Nahin Aata

‘anjum’ tumhen ulfat abhi karna nahin aata

har ek pe marte ho pa marna nahin aata

aalam ke hasin bharte hain ankhon men tumhari

dam ishq ka bharte ho pa bharna nahin aata

ham jaan hi se apni guzar jaaen to behtar

hat-darmi se un ko jo guzarna nahin aata

lo nam-e-khuda ham se banate hain vo baten

jin ko ki abhi baat bhi karna nahin aata

kahte ho miri laash pe maara hai ye kis ka

kyuun ji yahi kahte the mukarna nahin aata

bikhre hue balon men bhi hain laakh adaen

alhad ko abhi mere sanvarna nahin aata

kya vasl ki shab kaati hai fiqre hi bata kar

sach hai ki tumhen baat katarna nahin aata

aisa tu hamen piis ki hon ankhon ka surma

ai charkh tujhe jaur bhi karna nahin aata

haq ye hai ki anjum tira dil thahre to kyun-kar

siine pe unhen haath bhi dharna nahin aata

More Poems

Leave a Comment