Ashar Najmi
andhere men tajassus ka taqaza chhoḌ jaana hai
kisi din ḳhamushi men ḳhud ko tanha chhoḌ jaana hai
samundar hai magar vo chahta hai Dubna mujh men
mujhe bhi us ki ḳhatir ye kinara chhoḌ jaana hai
bahut ḳhush huun main sahil par chamakti sipiyan chun kar
magar mujh ko to ik din ye ḳhazana chhoḌ jaana hai
tulu-e-sub.h ki aahaT se lashkar jaag ja.ega
chala jaa.e abhi vo jis ko ḳhema chhoḌ jaana hai
na jaane kab koi aa kar miri takmil kar jaa.e
isi ummid pe ḳhud ko adhura chhoḌ jaana hai
kahan tak ḳhaak ka paikar liye phirta rahunga main
use barish ke mausam men nihatta chhoḌ jaana hai
Leave a Reply