amir-e-shahr is ik baat se ḳhafa hai bahut
ki shahar bhar men sag-e-dard chiḳhta hai bahut
har ek zaḳhm se zaḳhmon ki konplen phuTin
jo baagh tum ne lagaya tha ab hara hai bahut
zara si narm-ravi se pahunch ga.e dil tak
tanav tha to samajhte the fasla hai bahut
jo dam ghuTe to shikayat na kijiye sahab
ki saans lene ko zahron bhari hava hai bahut
charagh lakhon hon raushan nazar nahin aate
yahan to chehra-paraston ko ik diya hai bahut
ye tai hai mujh se kabhi tark haq nahin hoga
ki meri ḳhaak men ye kimiya mila hai bahut
mumasalat ke havalon men mat talash karo
umumiyat se hamari ghazal juda hai bahut
Leave a Reply