Farhan Salim
aks kuchh na badlega a.inon ko dhone se
azari nahin aati pattharon pe rone se
mas.ala na suljhega pyaas bujh na pa.egi
be-hisi ke saghar men aap ko Dubone se
toḌ do haden saari ye bhi tajraba kar lo
zaat aur simTegi be-hijab hone se
lab pe zom-e-mai-ḳhvari aur qadam bahakte hain
sirf kasa-e-mai men ungliyan Dubone se
har sadaf ke siine men gir raha hai ik moti
dard-o-gham ke maron ki kashtiyan Dubone se
zaḳhm roz ik taaza de diya karo varna
be-dili si rahti hai dard ke na hone se
har lahu fughan dega har diya dhuan dega
daagh miT nahin sakte damanon ko dhone se
kaun si vo atish thi mere ḳhuun men ‘salim’
haath jal ga.e us ke ungliyan Dubone se
Leave a Reply