Ashfaq Nasir
aks ko phuul banane men guzar jaati hai
zindagi a.ina-ḳhane men guzar jaati hai
shaam hoti hai to lagta hai koi ruuTh gaya
aur shab us ko manane men guzar jaati hai
har mohabbat ke liye dil men alag ḳhana hai
har mohabbat usi ḳhane men guzar jaati hai
zindagi bojh batata tha batane vaala
ye to bas ek bahane men guzar jaati hai
tu bata aankh naya ḳhvab kahan se dekhe
roz shab tujh ko bhulane men guzar jaati hai
vo chala jaata hai aur sa.at-e-ruḳhsat ‘ashfaq’
jism ka bojh uThane men guzar jaati hai
Leave a Reply