Dar nahin mujh ko gunahon ki giran-bari ka
teri rahmat hai sabab meri subuksari ka
daar ne ik sag-e-duniya ko ye baḳhsha hai uruuj
hai farishton men bhi charcha miri din-dari ka
dil o jaan saunp chuke ham tujhe ai jan-e-jahan
ab hamen ḳhauf hi kya apni giraftari ka
jaan bhi chiiz hai koi ki rakhen tum se daregh
paas itna bhi na ho rasm-e-vafadari ka
saqiya sab ko tiri ek nazar kaafi thi
tha kise hosh tire ahd men hushyari ka
main fida aaj bhi ho jaa.e vahi ek nigah
ḳhatma ho kahin is daur ki ḳhuddari ka
ashiqon ke liye hai daar hi daru-e-shifa
ishq ki tib men dava naam hai bimari ka
ajal istada hai balin pe mariz-e-gham-e-ishq
aankh to khol zara vaqt hai bedari ka
‘jauhar’ aur hajib o darban ki ḳhushamad kya ḳhuub
arsh o kursi pe guzar hai tire darbari ka
Leave a Reply