akele rahne ki ḳhud hi saza qubul ki hai
ye ham ne ishq kiya hai ya koi bhuul ki hai
ḳhayal aaya hai ab rasta badal lenge
abhi talak to bahut zindagi fuzul ki hai
ḳhuda kare ki ye pauda zamin ka ho jaa.e
ki aarzu mire angan ko ek phuul ki hai
na jaane kaun sa lamha mire qarar ka hai
na jaane kaun si saa.at tire husul ki hai
na jaane kaun sa chehra miri kitab ka hai
na jaane kaun si surat tire nuzul ki hai
jinhen ḳhayal ho ankhon ka lauT jaa.en vo
ab is ke ba.ad hukumat safar men dhuul ki hai
ye shohraten hamen yunhi nahin mili hain ‘shakil’
ghazal ne ham se bhi bahut vasul ki hai
Leave a Reply