Farhat Ehsas
ajiib tajraba ankhon ko hone vaala tha
baghair niind main kal raat sone vaala tha
tabhi vahin mujhe us ki hansi suna.i paḌi
main us ki yaad men palken bhigone vaala tha
kisi badan ki sada ne bacha liya mujh ko
main varna ruuh ke jangal men khone vaala tha
ye soch soch ke ab to hansi si aati hai
shuru-e-ishq men kitna main rone vaala tha
kabhi hui na mulaqat shahr se meri
main jab bhi so ke uTha shahr sone vaala tha
agar yahi hai mohabbat to hone vaali thi
vo milne vaala tha mujh ko main khone vaala tha
mujhe nikal diya ta.aziyat ke jalse se
ki bas vahan main akela hi rone vaala tha
ye mera dida-e-tar ḳhushk ho gaya varna
mire liye bhi yahan koi rone vaala tha
is aa.ine ne usulon pe zid na ki ki varna
main apne aap ke bar-aks hone vaala tha
kisi ne mahfil-e-duniya ki dhun badal Daali
zamana jab mira ham-raqs hone vaala tha
vahan bas ik dil ḳhali tha aur miyan-‘ehsas’
na ishq un ko hua tha na hone vaala tha
Leave a Reply