ajiib khvahish hai shahr valon se chhup chhupa kar kitab likkhun
tumhare naam apni zindagi ki kitab ka intisab likkhun
vo lamha kitna ajiib tha jab hamari ankhen gale mili thiin
main kis tarah ab mohabbaton ki shikastagi ke azaab likkhun
tumhi ne mere ujaad raston pe khvahishon ke diye jalae
tumhi ne chaha tha khushk honton se chahaton ke gulab likkhun
kabhi vo din the ki niind ankhon ki sarhadon se pare pare thi
magar main ab jab bhi sona chahun tumhari yadon ke khvab likkhun
main tanha ladki dayar-e-shab men jalaun sach ke diye kahan tak
siyahkaron ki saltanat men main kis tarah aftab likkhun
qayadaton ke junun men jin ke qadam lahu se range hue hain
ye mere bas men nahin hai logo ki un ko izzat-maab likkhun
yahi bahut hai ki in labon ko sada se mahrum kar ke rakh duun
magar ye kaisi musalahat hai samundaron ko sarab likkhun
Leave a Reply