ai shaiḳh mujh ko ḳhvahish-e-bagh-e-iram nahin
kucha buton ka mere liye us se kam nahin
pahli si us men adat-e-jaur-o-sitam nahin
afsos ab yahi hai ki is vaqt ham nahin
haan ku-e-ghair men tire naqsh-e-qadam nahin
tujh par mira guman ḳhuda ki qasam nahin
mujh nim-jan ke qatl men taḳhir is qadar
ma.alum ho gaya tire ḳhanjar men dam nahin
naalo tumhare haath hai furqat men apni sharm
dekhen to aaj charḳh nahin hai ki ham nahin
ab-e-baqa ho mujh ko pilao jo ab-e-tegh
tum zahr bhi jo do to vo amrit se kam nahin
karta hai mujh se ahd-e-vafa to vo but magar
mujh ko kuchh e’tibar ḳhuda ki qasam nahin
mumkin nahin kahin ho Thikana ‘fahim’ ka
teri nigah-e-lutf agar ai sanam nahin
Leave a Reply