ai sanam vasl ki tadbiron se kya hota hai
vahi hota hai jo manzur-e-khuda hota hai
nahin bachta nahin bachta nahin bachta ashiq
puchhte kya ho shab-e-hijr men kya hota hai
be-asar naale nahin aap ka dar hai mujh ko
abhi kah dijiye phir dekhiye kya hota hai
kyuun na tashbih use zulf se den ashiq-e-zar
vaqai tul-e-shab-e-hijr bala hota hai
yuun takabbur na karo ham bhi hain bande us ke
sajde but karte hain haami jo khuda hota hai
‘barq’ uftada vo huun saltanat-e-alam men
taj-e-sar ijz se naqsh-e-kaf-e-pa hota hai