haidar-ali-aatish

Ai Sanam Jis Ne Tujhe Chand Si Surat Di Hai

ai sanam jis ne tujhe chand si surat di hai

usi allah ne mujh ko bhi mohabbat di hai

tegh be-ab hai ne bazu-e-qatil kamzor

kuchh giran-jani hai kuchh maut ne fursat di hai

is qadar kis ke liye ye jang-o-jadal ai gardun

na nishan mujh ko diya hai na tu naubat di hai

saanp ke kaate ki lahren hain shab-o-roz atin

kakul-e-yar ke saude ne aziyyat di hai

aai iksir ghani dil nahin rakhti aisa

khaksari nahin di hai mujhe daulat di hai

shama ka apne fatila nahin kis raat jala

amal-e-hub ki bahut ham ne bhi davat di hai

jism ko zer zamin bhi vahi pahuncha dega

ruuh ko jis ne falak sair ki taqat di hai

furqat-e-yar men ro ro ke basar karta huun

zindagani mujhe kya di hai musibat di hai

yad-e-mahbub faramosh na hove ai dil

husn-e-niyyat ne mujhe ishq se neamat di hai

gosh paida kiye sunne ko tira zikr-e-jamal

dekhne ko tire, ankhon men basarat di hai

lutf-e-dil-bastagi-e-ashiq-e-shaida ko na puchh

do jahan se is asiri ne faraghat di hai

kamar-e-yar ke mazmun ko bandho ‘atish’

zulf-e-khuban si rasa tum ko tabiat di hai

More Poems

Leave a Comment