Gulzar Dehlvi
ai masiha-dam tire hote hue kya ho gaya
baiThe-biThla.e mariz-e-ishq ThanDa ho gaya
yuun mira soz-e-jigar duniya men rusva ho gaya
sher-o-naghma rang-o-nik.hat jam-o-sahba ho gaya
charagar kis kaam ki baḳhiya-gari teri ki ab
aur bhi chak-e-jigar mera huvaida ho gaya
hai tiri zulf-e-pareshan ya mari divangi
jo tamasha karne aaya ḳhud tamasha ho gaya
haa.e ye taaza hava gulshan men kaisi chal paḌi
bulbul-e-bagh-o-baharan ru-ba-sahra ho gaya
umr-bhar ki mushkilen pal bhar men asan ho ga.iin
un ke aate hain mariz-e-ishq achchha ho gaya
kya mire zaḳhm-e-jigar se khil uThi hai chandni
kin charaghon se zamane men ujala ho gaya
har tarah mayus aur mahrum ho kar pyaar se
jis ke tum pyare the vo maula ko pyara ho gaya
ham gunahgaron ki laghzish hashr men kaam aa ga.i
chashm-e-nam ka daman-e-tar ko sahara ho gaya
ik miri shaḳh-e-nasheman phunkne ke vaste
kis ki kaj-fahmi se ghar-bhar men ujala ho gaya
ab shafaq ya abr ka ‘gulzar’ kyuun ho intizar
un ki ankhon se jo piine ka ishara ho gaya
Leave a Reply