ai husn jab se raaz tira pa gae hain ham
hasti se apni aur qarib aa gae hain ham
yuun bhi hua ki jaan ganva di tire liye
yuun bhi hua ki tujh se bhi katra gae hain ham
rah-e-vafa men aise maqamat bhi mile
apna sar-e-niyaz bhi Thukra gae hain ham
yadash-ba-ḳhair ik gul-e-shadab the kabhi
aisi ḳhizan paḌi hai ki kumhla gae hain ham
sub.h-e-visal thi to tabi.at thi baagh baagh
sham-e-firaq aai to sanvla gae hain ham
insan teri fat.h pe ab bhi yaqin hai
go apni zindagi se bhi ghabra gae hain ham
mahrumiyon ka bar-e-giran dosh par liye
ai maut sun ki tere qarib aa gae hain ham
apne subu men talḳhi-e-dauran sameT kar
ba-sad-ḳhulus nosh bhi farma gae hain ham
tariḳh-e-inqilab-e-zamana se puchh lo
jab jab sada mili sar-e-dar aa gae hain ham
‘ajmal’ jab un ki bazm men chheḌi hai dil ki baat
apne to ḳhair ghair ko taḌpa gae hain ham
Leave a Reply