Ai Dil-E-Be-Qarar Chup Ho Ja

Saghar Siddiqui

ai dil-e-be-qarar chup ho ja

ja chuki hai bahar chup ho ja

ab na a.enge ruThne vaale

dida-e-ashk-bar chup ho ja

ja chuka karavan-e-lal-o-gul

uḌ raha hai ghubar chup ho ja

chhuT jaati hai phuul se ḳhushbu

ruuTh jaate hain yaar chup ho ja

ham faqiron ka is zamane men

kaun hai gham-gusar chup ho ja

hadson ki na aankh khul jaa.e

hasrat-e-sogvar chup ho ja

giit ki zarb se bhi ai ‘saghar’

TuuT jaate hain taar chup ho ja