ai dil achchha nahin masruf-e-fughan ho jaana
gham ki tauhin hai ashkon ka ravan ho jaana
dil ki avaz bhi majruh jahan hoti hai
aise halat men ḳhamosh vahan ho jaana
mere aansu jo giren Taank lo tum juuḌe men
dekh le koi to phulon ka guman ho jaana
ahl-e-sahil ko bhi andaza-e-tufan ho jaa.e
qatra-e-ashk zara sail-e-ravan ho jaana
ruḳhsat-e-mausam-e-gul ke bhi uThao sadme
itna asan nahin ehsas-e-ḳhizan ho jaana
qaid-e-mausam nahin naghmat-e-ana dil ke liye
koi mausam ho gul-e-tar ki zaban ho jaana
mere jiine ka sahara thiin jo nazren kal tak
kya sitam hai unhen nazron ka garan ho jaana
shauq-afza hai ye andaz-e-hijab-e-ḳhuban
dil men rahte hue ankhon se nihan ho jaana
vo gulistan men jo aa jaa.en to mumkin hai ‘ḳhayal’
muskurati hui kaliyon ka javan ho jaana
Leave a Reply