Sameena Gul
ai arz-e-vatan ham tujhe ta.amir karenge
ham tera muqaddar tiri taqdir likhenge
Daali hai kamand ham ne sitaron pe hamesha
hamrah surayya ki bhi zanjir karenge
ḳhurshid-e-vatan ko inhi hathon se ujala
ham chand sitaron ko bhi tasḳhir karenge
iqbal ke shahin hain shahbaz usi ke
dekhe hue har ḳhvab ki ta.abir banenge
samjha.enge ab ham tumhen maz.hab ke ma.ani
ham amn-o-aḳhuvvat tiri jagir karenge
parcham ke sitare men bharen apni ziya.en
ham apne junun se tujhe tanvir karenge
ghamgin manazir na ḳhuda dekhe dikha.e
ham pyaar mohabbat se ye tasvir bharenge
phir fasl-e-gul-o-lala se mahkega chaman ye
ham nok-e-saba se tujhe tahrir karenge
Leave a Reply