ahl-e-zahir ko fann-e-jalva-gari ne maara
ahl-e-batin ko tavana-nazari ne maara
talḳh thi maut magar ziist se shirin-tar thi
us se puchho jise be-bal-o-pari ne maara
mundamil hote hue zaḳhm hare hone lage
saa.e saa.e men tiri ham-safari ne maara
dasht-e-ghurbat ke shab-o-roz ki lazzat na mili
sar vatan men bhi bahut dar-ba-dari ne maara
ishq aur dast-e-talab aisi bhi kya majburi
shauq ko kavish-e-daryuza-gari ne maara
zaḳhm-e-parina bhara hi tha ki ai sozan-e-hal
aur ik tiir tiri baḳhiya-gari ne maara
dad-o-shamshir ne jab jab bhi Darana chaha
qahqaha shauq ki shorida-sari ne maara
sulh karna to zamane se hai asan lekin
mujh ko ‘zaidi’ miri baligh-nazari ne maara
Leave a Reply