Shahr-E-Fasl-E-Gul Se Chal Kar Pattharon Ke Darmiyan

Bashir Farooqi

shahr-e-fasl-e-gul se chal kar pattharon ke darmiyan

zindagi aa ja kabhi ham be-gharon ke darmiyan

main huun vo tasvir jis men hadse bharte hain rang

ḳhal-o-ḳhat khulte hain mere ḳhanjaron ke darmiyan

pahle ham ne ghar bana kar fasle paida kiye

phir uTha diin aur divaren gharon ke darmiyan

ahd-e-hazir men uḳhuvvat ka tasavvur hai magar

tazkaron men kaghazon par rahbaron ke darmiyan

un shahidan-e-vafa ke naam mere sab suḳhan

sar-bulandi jin ko hasil hai saron ke darmiyan

kaisa fan kaisi zehanat ye zamana aur hai

siikh lo kuchh shobade bazigaron ke darmiyan

uḌ gaya to shaḳh ka saara badan jalne laga

dhuup rakh li thi parinde ne paron ke darmiyan

ye jo ḳhana hai sukunat ka yahan likh do ‘bashir’

phuul huun lekin khila huun pattharon ke darmiyan