Ahl-E-Dil Jo Bhi Baat Kahte Hain

Poet

ahl-e-dil jo bhi baat kahte hain

koi raz-e-hayat kahte hain

un ke gham se hai javedan varna

ziist ko be-sabat kahte hain

haa.e vo daur-e-ishq jab aansu

dastan-e-hayat kahte hain

ḳhvab-e-ghaflat men jo guzarta hai

ham to us din ko raat kahte hain

ishq ki istilah men gham ko

inqalab-e-hayat kahte hain

jo bhi hain vaqif-e-haqiqat-e-dil

dil ko hi ka.enat kahte hain

lafz-o-ma.ani men aa nahin sakti

vo nazar se jo baat kahte hain

mard-e-haq men to ma-siva ko bhi

partav-e-husn-e-zat kahte hain

muddaton ghaur karna paḌta hai

un se jab dil ki baat kahte hain

kar-gah-e-nuqush-e-ibrat ko

‘kaif’ sab ka.enat kahte hain